Ang Joyeal Debbarma, Tripura ni khoroksa sikwla eba swrwngnai. Tripura ni borok rok hala haphung ni mui chalaijawo. Chini o chamung nungmung no kahamkhe celebrate khaina bagwi Agulini Dasarath Bhavan o hai no hai kaisa Food Festival organize khaijakkha.
Bhavan ni gana soguite soguite, chini chamung ni bahai nokbaar o manui maai okhui phaiyo.
Bisi borom borom no tiprasa rog nijini chamung nwngmung no twiwi traditional food festival khayo. Agio wgkhe Aguli ni Astable Ground o khwlai jagu. Takwlai ‘Corona’ ni kebenagmung bai kisa jwngjal wgmani bagwi jaga kutul laikha.
Tiprasa ni food festival o kwbangma phaljaakmani nukjakha. Oro phalnai rog saakni kanmung chumung no sogu twyai jotonono lamsogwi phalo. Ani mokolo wgkhe stall no. 05 o kwbang borok no chamani nokha. Bini oro manthokha “Awang-Bangwi, Maidol, Awang-Sokwrang tei Kakai (pork) mosideng rog.
Awaan bangwi
O awang bangwi agini simi no tiprasa rog ni hoda o chajagwi phayo. Obo food festival o kaisa awang bangwi Rs. 20 khawi phal jagu. Bono swnam nani bagwi manwi nangmani wngkha “mamita mairom, warok, lairu, hasing, som, piyas” obono saphulwi ‘lairu’ bai kitingwi twi kotongo rokha khe awang bangwi wgo.
Wasong gudok
Obobo haino tiprasani chamung kwcham bini mung wgkhe wasong gudok. Food festival o kaisa wasong gudok Rs 80 khe phal jagu. Bono belai khe chanai bango tei thokjaknai bo bango. Bono swnam na bagwi kwbangma juda juda mui rwai swnam mani haiphano ‘berma’ (fermented fish) belai khe nangkuk mani. Berma no karwi wasong-gudok swnam maya. Bisingo tongo muya, swtwi, ah, lobiya. O mui kwthwng tei berma noi ‘wa-mikil’ bisingo twi saphulwi horo khikwlai rwkha khe wasong-gudok wngo.
Muya Chakhwi
Omobo Kaisa Tiprasani chamung. Muya (bamboo shoots) no awaan tei soda riwoi sungjaago.
Bono karwi Tripurao mui kwrwi hwn jagu. Bono chaya khe Tiprasaya hinwi hwn jagu aswk khai bwkha ni chamung. Festival o bono nijini muchungma khe pai mano. Bini morokmani khe Rs. 10 per plate. Bini logio kakamuk bo saphul jak. Bono swnam na bagwi nango “muya, berma tei soda” tei obono logio je mui kwthwng no saphul na muchungo saphulwi songwi chai mano.
Awang-sokwrang
Tiprasa song ni kha ni chamung khe awang-sokwrang. Festival o bono nijini etsha khe payai mano.. Bini morokmung chengmani khe Rs. 10 ni chimi. Bono swnam bagwi mamita mairom tei haching nango. O awang no chakha khe seler mani phai jagu jotono haiphano belai khe kothok tei jotoni bwkha o tongthai swnam jak o chamung.
Muimasing
Obo khe kaisa seasonal mui. Muimasingni bumung bai no saimano je bo masingo manjago. Bo haino Tiprasani chamung haiphano tabuk wgkhe twrwk twrwk buini dophani borok bo muimasing chanani hamjagu. Festival o muimasing mosodeng no Rs. 50 ke phaljago.Muimasing sak tei sak ham ni bagwi belai nangkuk mani bithi hinwi sini jagu. Bono swnam na bagwi muimasing rugwi karikhe berma tei moso sogwi saphul khe mosideng wgo.
Kakamuk (freshwater snails)
Kakamuk bono buini dopha ni borok chanai kwrwi. Festival o kakamuk mosideng per plate Rs. 20 khe phal jagu. Kakamuk pokhiri haya khe twi kotoro man thogu. Bono swnam na bagwi kakamuk rogwi kariwi berma tei moso sogwi, allu rogwi saphul khe kakamuk mosideng wgwi sinijagu.
Obo hai dal bidal Tripura ni chamung chana muchunkhe khe jotonono lamsogwi tongo Triprasa rog. Chana muchungkhe chini Tripura haste o phawi chaphaidi. Welcome (lamsogu).