Fire Officer Biswajit Debbarma bisi bwrwi (4 years) haba khaimao kwbaangma borok rogno hor ni thaani mwthaangkha. Phiyaba, bono khe Panisagar highway o kuthumlaijaak borok rok lama kasorwi latha bai buwi buthaarkha November 21st o. O saal o, Biswajit Debbarma, bini Damsora Fire Service department o lenglama saanwi bini bihik bwsa bai maanlaina bagwi bike kaasawi onkhaarmani. O saal o bini cherai bwsajwk ni saak hamya ni kok sokphaimani. Aboni ulo no, Biswajit Debbarma lenglama sankha. Bini nukhung ni borok rok khe Nepaltilla o tongo. Nogo thaang tonfuru no Bru settlement no protest khai tongnai rok bono baaksa khaiwi buthaarkha hinwi sajaago. Bujaakmani yak ulo kwsa wngjaak Biswajit no Dharmanagar Hospitalo twlang jakha, aaro narwk maya wgwi Agartala GB govt. Hospital o twlang mani arono langma chokha.
Bo aamotwi khe buthaar jaakmani no video swnaamkha aaro tongnai borok rok. O video jotoni thaani baagjaakma ulo, haste ni CM, Biplab Deb khoraikha.
Bini senior Mwchang Mohan Singh Jamatia saawo je Biswajit Debbarma belai khe rules maniwoi samung tango mongsa hinjakya tw. “Bo belai khe kaham borok tongmaani eba belai khe disciplined bo. Bo bisi bwrwi aani naikaani o samung taangma o kwbaangma borok no mwthaangkha,” Mohan Singh saakha. Mwchang Debbarma 2017 o Damsara ni Fire Service Department o samung thepa jaakmani. Mwchang Mohan Singh teibo sakha, 22nd November o Fire Service malkhung tei kaai nwi escort nawoi takhuk biswajit Debbarma ni kwthwi dehaar no bini para o tunbu maani haino hai kwthwi malkhung no kaasolaikha cherai tei sikla rok. O cherai tei sikla rok Biswajit Debbarma no buthaarjaakmani bai belai khe jolilai tongmani.
Paatimung ni unklogni Koktwma
Patimung wgkha Bru dopha no twiwi. Mizoram ni 37,000 Bru dopha ni phainai rog no haste hapang tongthai rwna bagwi state tei central government yapiri semani, haiphano Mizo convention tei Nagrik Suraksha Mancha rog tongthai rwya hinwi gosiya. Abono twiwi kaisa Joint Movement Committee (JMC) swnaamjaakkha. Teibo kahamkhe oro swrwngwi maano.
November 21st o, JMC song North Tripura ni national highway kasokha. Omohai kasothani protest violent wngwi thaankha tei Biswajit Debbarma nogo kiphil phoro lamao maanjagwi bwthar jakha. Sai mankha Biswajit Debbarma ni bihik tei khoroksa bwsajwk tongo. Borok nogo naising lai tong mani nogu kiphilwi sogwi liya.
Justice sanlaaikha
Thwinai Biswajit Debbarma no twiwi kwbangma jagaono chati mwswng laikha tei rally khailaikha. Thanai 25th Nov o TPF (TRIPURA PEOPLE FRONT) group rog strike hinwi sakwlai rwkha. A strike o kwbangma jagao lahar kaso jakha Madop Bari, Champak Nagar, Baramurao TPF(TRIPURA PEOPLE FRONT) Rog ni sanmung “tangwi police rog arrested khaya bwtharnai Rog no? Dati phat phat arrested khaina wngthung. Khaya khe chwng haino tongya thwi nang khe thwi rwnai” hai hinwi borok ni lahar kasolai mung.
Kwbangma jagaono chwla bwrwi pal baksa khaiwi yapiri bar nani bagwi borok ni koimung. “Tamo ni bagwi justice Maya, tamo ni bagwi haikhe bwthar jakna nang, tangwi haste hapang kok thaisa saya mokol bwswkango lamao bwthar jagwi‘? TPF (Tripura People’s Front) rog ni swngmung. Haste hapang mungsa saya ni bagwi tini justice mana bagwi lamao ongkhor laikha sikla sikili joto pal baksa khe slogan rwlayai.
24th November o haino Khumulwngo justice sanlai mani joto pal baksa khailai chati mwswng lai mani Biswajit Debbarma ni bagwi. 21th Nov ni simi jotono Tripura o mwkhang somlaijak nilar siring sorong wglaijak.
Thang nai sal 24th November o INPT (Indigenous Nationalist Party of Twipra) o bo haino hai Biswajit Debbarma no twiwi justice saanlaikha. INPT ni kotor, Mwchang Animesh Debbarma sakha “ 34,000 Bru dopha no arono ma toni nai abono chini swmai wgna nangnai.” Bo teibo sakha je Mizo no chini haa Tripura o toni mani, kwbangma jaga o missionary school khairwi toni mani, chini Bubagra khairok jagwi wanjwi rog no haa rwmani, je jaga mai chao arono khuktui rwo hinwi. Wanjwi rog bru dopha no refugee hinwi Toni rwna hinya ‘wanjwi Rog le boroni‘? obobo luku ni swngmung.
Tabuk jora twi kwbangma group rog rang khollaikha butharjaaknai ni family no chubachu rina bagwi. Bubagra Pradyot Kishore Manikya bo raang chubachu rikha tei sakha je Bru rok Tripura ni borok no, aboni bagwi borokno Tripura haste o nukhung rina naango. Bo Biswajit Debbarma ni bangwi justice bo sankha.
This article is created as a part of the Adivasi Awaaz project, with the support of Misereor and Prayog Samaj Sevi Sanstha.